મહારાષ્ટ્રના પુણેમાં રવિવારે સાંજે એક ભયાનક માર્ગ અકસ્માતમાં 48 વાહનો અથડાયા હતા, જે બાદ કારના ફુરચા ઉડી ગયા હતા. પુણેમાં મુંબઈ-બેંગલુરુ હાઈવે પર રવિવારે સાંજે પુલના ઢોળાવ પર એક ટ્રકે કાબૂ ગુમાવતાં 48 જેટલા વાહનોને નુકસાન થયું હતું. પોલીસ અધિકારીએ જણાવ્યું હતું કે બ્રેકની શંકાસ્પદ નિષ્ફળતાને કારણે અથવા ડ્રાઇવરે ટ્રક પરનો કાબૂ ગુમાવવાને કારણે નવલે પુલ પર અકસ્માત થયો હતો.
પોલીસ અધિકારીએ જણાવ્યું કે આ ઘટનામાં લગભગ 50 લોકોને નાની-મોટી ઈજાઓ થઈ હતી અને તેમને સ્થળ પર જ પ્રાથમિક સારવાર આપવામાં આવી હતી. જો કે અન્ય છથી આઠ લોકોને બે હોસ્પિટલમાં સારવાર માટે ખસેડવામાં આવ્યા છે. સદનસીબે આ અકસ્માતમાં કોઈનું મોત થયું નથી.
જણાવવામાં આવી રહ્યું છે કે અકસ્માત દરમિયાન રોડ પર ઓઈલ ઢોળાઈ ગયું હતું, જેના કારણે રોડ લપસણો વધી ગયો હતો અને તેના કારણે વાહનો એકબીજા સાથે અથડાવા લાગ્યા હતા.
અથડામણ કેટલી ભયાનક હતી તે અકસ્માતમાં ક્ષતિગ્રસ્ત વાહનોની હાલત જોઈને સરળતાથી સમજી શકાય છે. અકસ્માતમાં અનેક વાહનો સંપૂર્ણ નાશ પામ્યા હતા, જ્યારે કેટલાક વાહનોને નજીવું નુકસાન થયું છે.
આ અકસ્માતમાં કેટલાક વાહનોનો આગળનો ભાગ સંપૂર્ણ ક્ષીણ થઈ ગયો હતો, જ્યારે કેટલીક કારનો પાછળનો ભાગ ખરાબ રીતે ક્ષતિગ્રસ્ત થયો હતો. અકસ્માત બાદ વાહનોને રોડ પરથી હટાવવા માટે ક્રેઈનની મદદ લેવામાં આવી હતી.
મુખ્યમંત્રી એકનાથ શિંદેએ અનેક વાહનો સાથે ટેન્કરની ટક્કરથી થયેલા અકસ્માત અંગે પોલીસ પાસેથી માહિતી લીધી છે. મુખ્યમંત્રીએ આ અકસ્માત કોઈની બેદરકારીને કારણે થયો છે કે કેમ તેની તપાસ કરવા નિર્દેશ આપ્યો છે. આ સાથે તેમણે પ્રશાસનને અકસ્માતમાં ઘાયલોની યોગ્ય સારવારની વ્યવસ્થા કરવા પણ સૂચના આપી છે. આ વિસ્તારમાં અકસ્માતને કારણે ટ્રાફિક જામની સમસ્યા ન સર્જાય તે જોવાની સૂચના પણ તેમણે આપી છે.
માહિતી આપતા પોલીસે જણાવ્યું કે, ઝડપભેર કન્ટેનર સાતારાથી મુંબઈ તરફ જઈ રહ્યું હતું અને તે દરમિયાન અચાનક તેની બ્રેક ફેઈલ થઈ ગઈ. આ પછી કન્ટેનરથી 48 વાહનોને નુકસાન થયું હતું. અકસ્માત બાદ સતારાથી મુંબઈ જતા રોડ પર 2થી 3 કિલોમીટર લાંબો જામ થઈ ગયો હતો, પરંતુ પોલીસે ટૂંક સમયમાં વાહનો હટાવીને જામ હટાવ્યો હતો.
